Një çift shqiptarësh është arrestuar dje pasdite në zonën e Padovas në Itali, pasi në makinën me të cilën udhëtonin iu gjetën 2 kg heroinë si dhe 33 mijë euro cash.
Sipas mediave italiane, ata udhëtonin sëbashku me fëmijën e tyre dhjetë muajshe me një automjet tip “Volkswagen Polo”.
Policia i ndaloi për kontroll, pasi kishin informacione se trafikantë droge qarkullonin në këtë zonë me makina të ngjashme.
Pasi i ndaluan, 29-vjeçari shqiptar shfaqi shenja nervozizmi, gjë që ngjalli dyshime tek efektivët. Pas kontrollit në automjet, policia i gjeti dy pako me heroinë, të cilat ishin mështjellë me çorape.
Ndër të tjera, policia i gjeti dhe një shumë prej 33 mijë eurosh që dyshohet se i kishin përfituar nga aktiviteti kriminal.
Efektivët ushtruan kontrolle edhe në banesën e shqiptarit ku në garazh i gjetën edhe 7 kg të tjera heroinë të ndara në pako.
Në përfundim të aksionit, i riu u arrestua dhe u la në burg, ndërsa gruaja e tij për shkak dhe të fëmijës së mitur, do të hetohet në gjendje të lirë.